eremuak-ek, AZALArekin lankidetzan, neguko egonaldien deialdi bat zabaldu du Euskal Autonomia Erkidegoko artista, sortzaile edo egoiliarrentzat. Deialdia ezohikoa da, kanpora bidaiatzeko aukera mugatuta egon den urte honetan, eta ikusizko arteen testuinguruan lan egiten duten artistei edo sortzaileei laguntzeko eskaintzen da.
AZALA artista, sortzaile, aktibista eta pentsalarientzako topagunea da, eta Lasierran (Araba) dago. Dantza eta arte eszenikoak gune honen epizentroa izanik, bere hedatze-uhinak naturaltasunez eta promiskuitatez zeharkatzen ditu beste arte diziplina batzuk. AZALA artadi mediterraneoko eta gari-sotoetako gune geobotanikoan dago, eta praktika artistikorako eta kultur sorkuntzarako gunea izateaz gain, naturarekin kontaktuan egoteko une eta eremu bat behar duten taldeen egonaldietarako espazioa da.