harriak: “zena eta dena” exposición

Kartzela zaharra 1912an eraiki zen, eta 70eko hamarkadara arte egon zen martxan. Presoen grafitoz beteak ditu paretak, eta izenak, datak eta marrazkiak utzi zituzten haietan. Hutsik dago orain, eta kultura ekitaldietarako erabili da puntualki.

Arretxinagako ermitak, kristautu aurretik kultu paganoetarako leku izanaren susmoa darabilki gainean. Meza gutxi egiten diren honetan, kultura ekitaldietarako erabilera eman zaio halaber.

Biak dira izaera handiko lekuak, historiaren marka asko dituztenak. Kartzelako erakusketak eta ermitako ekitaldiak lekuekin bat egiteko asmoa dute, haiekiko elkarrizketan zerbait eraikiz, aurretik zegoenari elementu berriak kontrajarrita.

Loturak egiten ditugun bakoitzean, elementu bakoitzak bestelakotze bat eragiten du gainontzekoengan, eta ezberdin ikusarazten dizkigu, edo bestela arretarik jarriko ez geniekeen xehetasunetara bideratzen gaitu.

Izan zena eta guk dakarguna hilabetez egongo dira elkarrekin.

Bisita-orduak:
Larunbatetik igandera 12:00–15:00
Astelehenetik ostiralera bisitatu nahi izanez gero, hitzordua jarri daiteke aurrez Uhagon kulturgunearekin, 946166303 telefonora deituz edo kulturgunea@uhagon.com helbidera idatziz.