Bapore Atelierrek artistak Horkasitas Jauregitik ateratzera gonbidatu ditu egindako lanak jauregiaren inguruan dagoen María Dapena artistaren omenezko lorategian jartzeko.
Proposamenak Iván Gómez, Claudia Rebeca Lorenzo eta Mónica Planes artistek egingo dituzte, Raquel Ángulo Balmasedako artistarekin eta HASZI programaren harira hautatutako Joey Ordoñez ikaslearekin batera. Gainera, UPV/EHUko Arte Ederretako Fakultateko Pintura Masterreko ikasleek (Eloy Pueyo, Jesús Ramos eta Nerea Pinedo) elkarrizketa bisuala osatuko dute Jauregiko barnealdearen eta kanpoaldearen artean, eta horri esker erakusketarako aukerak zabalduko dituzte.
Lorategiko erakusketa elementu organiko eta ez-organikoen arteko elkarbizitzarako espazio gisa ulertzen da; bertan, eskultura-materialak berezko habitat naturalaren parte izango dira. Ekosistema berri eta aberatsa osatuko dute.
Barnean kanpoaldeko kolorearen eta formaren arrastoa gelditzen da. Tonuak eta itxurak kanpoaldeko bizipena arakatzen dute. Aldi berean, askotariko elementuak sortu eta kanpoan gelditzen dira, lorategiaren giroan, bertako elementuekin integratuz eta deseginez. Barnealdeko oihartzunaren parte dira. Bulkaden adarrak: barnean eta kanpoan.
Eskultura eta pintura-materialen elkarbizitzarako ariketa plastikoa aurkezten dugu. Horiek artikulatzeko moduak bi bizipen-egoera dituen lorategia sortzen du: bizirik dagoena eta bizitakoa erregistratzen duena. Arteak lorategiaren historian duen eskuhartzetik abiatuta, orain, Bapore Atelierren, ekosistema berdinean batzea proposatzen dugu. Hormak iragazkortzen ditugu, lorategitik behaketaren eta ekoizpenaren inguruan hausnartzen dugu, harreman estuan elkarrekin bizi ahal izateko.
